"Пышақтап, тістеріне дейін сындырған": 18 жастағы тараздық жігіттің анасы әділдік іздейді
Тараз тұрғыны Аңсагүл Қасымова 18 жастағы ұлының бәзбіреулер тарапынан аяусыз ұрып, пышақталғанын айтты. Анасы әділдік іздеп, ұлының өліміне себепкерлердің жазаланбағанын жеткізді, деп хабарлайды "Expressnews.kz" ақпарат агенттігі.
18 жастағы Нұржігіт Жолшыбекті әлдекімдер пышақтап кеткен. Анасының айтуынша, жұмыстан қайтып келе жатқан ұлына бұзақылар шабуыл жасаған. Олар өзара араздасқан азаматтардың кегін Нұржігіттен қайтарған.
Анасы ұлының өліміне қатысты іс баяу жүріп, бұрмаланып жатқанын айтты. Нұржігітті пышақтаған сәті анық түсірілген бейне бар, бірақ ол тергеуге тіркелмеген.
18 жастағы жігіттің өліміне қатысты істі Алматы қаласының мамандандырылған ауданаралық соты қараған. Бұзақылардың бірі 20 жылға, қалған төртеуі 3,5 жылға сотталды. Бірақ үкім әлі заңды күшіне енбеген, себебі аппеляциялық шағым берілген.
Марқұмның анасы алғашқы сотта әділ шешім шыққанын, бірақ іс қайта қаралса, кінәлілер жазадан оңай құтылып кетпей ме деп алаңдайды.
